បណ្តាំម៉ែ...!

  នឹកអ្នកមានគុណ

១- ផ្គរលាន់គគ្រឹកគេងនឹកមមៃ                        នឹកពុកម៉ែថ្លៃ្ឯឯស្រែចំការ

     មិនដឹងជាសុខទុក្ខលោកយ៉ាងណា             ចិត្តកូនសោការលឹកពេកក្រៃ។

២- គេងស្តាប់ស្នូរភ្លៀងស្រក់ហូរតក់ៗ           ទឹកភ្នែកកូនស្រក់មកទាំងអាល័យ

     កូនគេងមិនលក់ទេព្រះគុណថ្លៃ                  ចិត្តនឹកស្រម៉ៃដល់ថ្ងៃម្តាយផ្តាំ។

៣-កូនអើយពេលកូនឃ្លាតពីមាតា                   ស្វែងរកសិក្សាកូនត្រូវចងចាំ

     ធ្វើជាមនុស្សល្អកុំបីសាំញុំា​                          ស្តាប់ពាក្យម្តាយផ្តាំកូននឹងបានសុខ។

៤- កូនត្រូវខំរៀនកុំឈ្លក់វង្វេង                     នឹងស្រីស្រាល្បែងអបាយមុខ

     អំពើទាំងនេះនាំអោយកូនទុក្ខ​                 ញាតិផៅក្នុងស្រុកគេស្អប់គេខ្ពើម។

៥- កូនត្រូវចេះរៀបប្ញកពារអោយបានល្អ         ពេលឃើញអ្នកក្រកុំធ្វើប្ញកឆ្នើម

     កុំវាយប្ញកពារជាមនុស្សរអើម                  ត្រូវចេះផ្តួចផ្តើមពាក្យពេជន៍សមគួរ។

៦- រាប់អានមនុស្សល្អពិតមិនក្រភ័ព្វ​                 មានញាតិច្រើនរាប់តាមផ្គាប់តាមផ្គួរ

     ទៅណាមកណាគេរាក់ទាក់សួរ ​              ញាតិមិត្តសមគួរកូនមិនព្រួយភ័យ។

៧- ឥរិយាទាំងបួនត្រូវខំហាត់ពត់                 ស្រគំស្រគត់ទើបមានតំលៃ

     ស្លូតបូតស្មោះត្រង់អំណត់ខន្តី                 ជីវិតកូនថ្លៃអាយុយឺនយូរ។

៨- ជីវិតកើតមករមែងជួបទុក្ខ                      បើចង់ស្រណុកត្រូវចេះគន់គូរ

      កំចាត់ភាពខ្ជិលកំសាកមូទូ                         ក្លាហានតស៊ូគង់ឈ្នះឧបសគ្គ។

៩- កូនអ្ហើយមនុស្សល្អគេសំគាល់ត្រង់          ចរិយាផូរផង់មិនអប្បលក្ខណ៍

      មិនកោងមិនកាចព្រហើនហួសថ្នាក់        ចេះស្គាល់ជ្រៅរាក់នូវទង្វើខ្លួន។

១០-អំពើមិនគាប់គួរកុំប្រព្រឹត្ត                      កូនត្រូវចេះគិតទៅតាមច្បាប់ក្បួន

       ធ្វើល្អបានល្អគ្មានអ្នកគុំគួន                    កិតិ្តយសពេញខ្លួនណាកូនមាសម្តាយ។

១១-ម្តាយនឹងឪពុកសុខចិត្តលំបាក               ស៊ូទ្រាំឥតស្រាកធ្វើការមិនណាយ

       អោយតែកូនល្អពុកម៉ែមិនស្តាយ             ទោះលំបាកកាយតែសប្បាយចិត្ត។

១២-សប្បាយចិត្តត្បិតម្តាយបានគិតថា          នឹងមានវាសនាបានឃើញកូនពិត

       មានចំណេះខ្ពស់ឈ្មោះជានិស្សិត              ជួយគ្រួសារពិតនិងជាតិខេមរា។

១៣-បានស្តាប់ពាក្យម្តាយទូន្មានផ្តែផ្តាំ              កូនកត់ចំណាំទុកក្នុងចិន្តា

       សំពះលាម្តាយទាំងទឹកនេត្រា                     កូនលាហើយណាលោកអ្នកមានគុណ។

១៤-ពុកបានជូនពរអោយកូនសុខា                    ទៅចុះកូនណាកុំបីស៊យស៊ុន

        ជួបតែសំណាងសាងជាទុន​                       ផុតចាកទារុណទុរជនទោសពៃរ៍។

១៥-កូនស្ពាយកាបូបឡើងលើរថយន្ត               ទាំងទុក្ខពេកពន់ពេញហរទ័យ

        ព្រួយចិត្តអាណិតលោកទាំងពីរក្រៃ           តទៅមុខថ្ងៃគ្មានអ្នកមើលថែ។

១៦-តែបានត្រឹមគិតមិនដឹងធ្វើម្តេច?                  មានតែប្រឹងធ្មេចខំគិតបង្វែរ

        ក្នុងចិត្តគិតថាកូនឃ្លាតពុកម៉ែ                    ថ្ងៃក្រោយវិលថែពុកម៉ែផុតភ័យ។

១៧-រថយន្តបាននាំរូបកូនទៅឆ្ងាយ                   អោយឃ្លាតពុកម្តាយនៅឆ្ងាយទីទៃ

        អើតតាមបង្អួតភ្នែកគួចរំពែរ៍                       ឃើញម៉ែរាដៃនៅឆ្ងាយសន្លឹម។

១៨-ឥឡូវរូបកូនមករស់ឯកា                              ដេកផ្សងវាសនាចាំក្តីសង្ឃឹម

        មានតែទឹកភ្នែកដូចភ្លៀងរលឹម               ភ្លៀងផ្គរគ្រឹមៗគ្រហឹមជាមិត្ត។

១៩-តែពាក្យម្តាយផ្តាំកូនចាំគ្រប់ម៉ាត់                មិនដែលរលាត់ចេញពីដួងចិត្ត

        កូនតែងអនុវត្តអោយដូចពាក្យពិត            ដែលពុកម៉ែគិតចង់អោយកូនល្អ។

២០-ក្នុងនាមកូនប្រុសកូនសូមប្តេជ្ញា                 ស្រោចស្រង់គ្រួសារអោយរួចផុតក្រ

        ជួយម៉ែជួយពុកអោយសុខបវរ               ក្នុងនាមកូនល្អសូមប៉ងសងគុណ៕

ខាងក្រោមនេះជាអត្ថបទរបស់ព្រះតេជគុណ សា ចាន់រ៉ាត់ ដែលផ្ញើរមកឲ្យចុះផ្សាយ ថ្ងៃទី ២០ ខែ សីហា ឆ្នាំ ២០១៣ លេខទូរស័ព្ទព្រះតេជគុណ 017​​​​​ 809 650​ / 098 370 097

អត្ថបទទី១

អត្ថបទទី២

អត្ថបទខាងក្រោមនេះជាអត្ថបទរបស់ កញ្ញា ឈុំ សុបិន្ត ដែលបានផើ្ញមកចុះផ្សាយ នៅថ្ងៃទី ២១ ខែ មេសា ឆ្នាំ ២០១២